gitara

four years ago...

hindi ko alam kung anong pumasok sa kukote ko noon at naisipan kong mag-aral tumugtog ng gitara. ang gusto ko lang naman talaga e mapalapit sa’yo. sabi mo kasi okay sa'yo yung mga marunong tumugtog ng gitara. kaya ayun, kahit wala akong hilig sa musika pinilit ko pa ring matuto para sa’yo.

after ilang months natuto din ako. pinag-aralan kong tugtugin yung mga favorite songs mo. nung isang beses nga na nag-jamming tayo, ako yung naggi-gitara tapos ikaw yung kumakanta. at anak ng tinola... sumablay ako! nakalimutan ko yung susunod na kwerdas dahil sa sobrang kaba.

bigla mong hinawakan ang kamay ko at tinulungan akong itipa yung susunod na chord. hindi na ako nakapagsalita at napatungo na lamang sa sobrang kahihiyan. pero kahit napahiya ako sa'yo masaya pa rin ako. yun kasi ang unang pagkakataon na hinawakan mo ang kamay ko.

kapag break time madalas tayong nagkikita sa utmt sa loob ng university. doon ka madalas nagpapalipas ng oras noon kasama ang mga kaibigan mo. pagkatapos kong kumain, doon na rin agad ako dumidiretso. nakikitambay pero hindi naman tayo nagkikibuan. nakakatawa pero kahit hindi mo ako kinakausap, kuntento na ako na mapagmasdan ka habang kumakanta kasabay ng romantikong musika ng iyong gitara.

noon, naisip ko na sana ako na lang ang naging gitara. madalas mong kasama, madalas mong ka-jamming, at madalas mong nabibigyan ng atensyon at pag-aalaga.

happy ending pa rin naman kahit hindi naging tayo. next month ikakasal ka na. at masaya ako para sa'yo. magkakaron ka na ng sarili mong pamilya. at tulad din ng sinabi sa commercial ng mcdo, anu't ano pa man, ikaw pa rin ang first love ko.

hindi man ako ang naging iyong gitara, para sa kin ikaw pa rin ang aking matamis na musika.